Навіны - Брэст
“Дабрыня” ніяк не можа арганізаваць прытулак для жывёл
15.06.2011
Аб’яднанню аховы жывёл “Дабрыня” брэсцкія мясцовыя ўлады адмаўляюцца бясплатна прадаставіць памяшканне для прытулку жывёл.
Больш за 30 бяздомных жывёл знаходзіцца ў кватэрах актывістаў аб’яднання, паколькі здымаць памяшканне ў той эканамічнай сітуацыі, якая склалася зараз у Беларусі, вельмі складана.
Па словах Галіны Кіляковай, чальца праўлення аб’яднання аховы жывёл “Дабрыня”, яны проста не могуць дазволіць сябе памяшканне:
- Нібыта знайшлі месца пад прытулак. Без пытанняў здадуць у арэнду. Але арэнда зараз высокая, мы проста матэрыяльна гэта не пацягнем самі. Бясплатна нам пакуль ніхто нічога не дае.
Як адзначае Галіна Кілякова, у сувязі з недахопам грошаў на жыццё, брэстаўчане ўсё больш пачынаюць прыносіць да сябраў аб’яднання сваіх хатніх жывёл, паколькі не хапае сродкаў на іх утрыманне.
Аліса Поль, Радыё Рацыя